د ۱۴۰۰ مالي کال ملي بودجې طرحې څرنګوالی وارزول شو
د ۱۴۰۰ مالي کال ملي بودجې طرحې څرنګوالی وارزول شو
د افغانستان د اسلامي جمهوریت د جمهوررئیس محمد اشرف غني په مشرۍ نن په جلا غونډو کې د ۱۴۰۰ مالي کال ملي بودجې طرحې د څرنګوالي او یو شمېر وزارتونو او خپلواکو ادارو د برنامو په اړه بحث وشو.
په دغو غونډو کې د نورو وزارتونو او خپلواکو ادارو تر څنګ د اوبو د چارو د تنظیم د ملي ادارې مسوولینو د ۱۴۰۰ مالي کال ملي بودجې د تخصیص او د هغې په چوکاټ کې د خپلو برنامو په اړه خپل راپورونه جمهوررئیس ته وړاندې کړل.
همداراز په دې غونډو کې د ۱۴۰۰ مالي کال ملي بودجې د طرحې، بودجوي پلانونو، د سپما د اغېز لوړولو، د پایلو پر بنسټ د بودجې د لګښت اغېزمنتیا، خلکو ته د خدمت رسولو په موخه د بودجې د سم لګښت او د بودجې د معقولیت د مسلې په اړه چې ټاکل شوې ملي شورا ته وړاندې شي، بحث او خبرې وشوې.
جمهوررئیس غني د یادو وزارتونو او ادارو مسوولینو د راپورونو له اورېدو وروسته دوی ته د ۱۴۰۰ مالي کال ملي بودجې د موخو په اړه چې د تایید په موخه به ملي شورا ته وړاندې شي، لازمې لارښوونې وکړې چې په رڼا کې یې اړوند وزارتونه او ادارې لا زیات کار وکړي.
