غزني ولایت کې د یوه چکډم او کانال چارې د څه باندې 7.5 میلیونه افغانیو په لګښت پيل شوې
د غزني ولایت په زنخان او اجرستان ولسوالیو کې د کوه سورخ چکډم د جوړوېدو او د بائي کانال د رغولو چارې د ۷ میلیونه، ۵۷۷ زره او ۲۳۸ افغانیو په لګښت د غزني ولایت د اوبو او انرژي ریاست د مسؤلینو په شتون کې پیل شوې.
د کوه سورخ چکډم د محور اوږدوالی 49.6 متره او لوړوالی یې ۶ متره ده چې د ۵۰۰۰ متره مکعب اوبو د زېرمه کولو وړتیا لري او د دبائي کانال ۳۱۸ متره اوږدوالی لري.
په نوموړو پروژو کې ګڼ شمېر کسانو ته د کار زمینه چمتو شوې او د چارو په بشپړېدو سره به یې د ځمکې لاندې اوبه تغذیه، سیلابونه کنټرول او د چاپيریال په ښکلا کې مثبت رول ولري.
د دغو پروژو چارې د اوبو او انرژي وزارت په مالي لګښت د غزني ولایت د اوبو او انرژي ریاست تر څارنې لاندې پرمخ وړل کېږي.
