غزني ولایت کې د یوه کوچني ذخیروي بند لومړنۍ سروې ترسره شوه

د غزني ولایت د سیندیزې فرعي حوزې تخنیکي ټیم د یاد ولایت د خواجه عمري ولسوالي په برکات کلي کې د غوجم کوچني ذخیروي بند لومړنۍ، اقتصادي، ټولنیزه او چاپېریالي سروې ترسره کړه.

د نوموړي ذخیروي بند په جوړولو سره به د ځمکې لاندې اوبه تغذیه، سېلابونه به مهار، د وچکالي منفي اغېزې به کمي شي او د چاپېریال په ښکلا به مثبته اغېزه ولري.

له بلې خوا د غزني ولایت د کامل کانال رغنیزې چارې 65 سلنه پرمخ تللې دي.

د غزني ولایت د سیندیزې فرعي حوزې تخنیکي ټیم او د اېف، اې، او د سوېل ختیځ زون آمر انجنیر عبدالقیوم سلېمانزوی او ورسره مل تخنیکي پلاوي د کامل کانال د چارو له بهیر څخه لیدنه وکړه.

د نوموړي کانال چاري د کاری پلان، نقشو او قرارداد سره سم پرمخ وړل کېدلې او د تخنیکي ټیم لخوا د قراردادي شرکت مسؤولینو ته د چارو د چټکتیا او لا ښه ترسراوي په موخه اړینې لارښوونې وشوې.

د یادولو وړ ده چې د کامل کانال د سلطان بند د لویو کانالونو لهٔ ډلې څخه دي، چې چارې یې 65 سلنه بشپړې شوي او 40 تنو ته پکې د کار زمینه هم برابره شوې ده.