غور ولایت کې د چکډمونو دوه پروژې د څه باندې اووه میلیونه افغانیو په ارزښت ګټې اخیستنې ته وسپارل شوې
![1](/sites/default/files/2024-08/img-20240831-wa0007.jpg)
د غور ولایت په دولت یار او سرجنګل ولسوالیو کې د کشکر او سیاه سنګ جوقول چکډمونو پروژې د 7 میلیونه، 62 زره او 142 افغانیو په ارزښت د غور د سیندیزې فرعي حوزې د رئيس محترم ملا رحمت الله اماني، د غور ولایت مقام د استازي او یو شمېر نورو سیمه ییزو مسؤلینو او د سیمې د ګڼ شمېر اوسیدونکو په شتون کې ګټې اخیستنې ته وسپارل شوې.
ښاغلي اماني د نوموړو چکډمونو پروژو ګټې ته د سپارلو په غونډه کې د اوبو د ارزښت په هکله خبرې کړې او زیاته یې کړه، چې اوبه ملي پانګه او الهي امانت دی چې باید ورڅخه په ښه توګه ګټه واخیستل شي.
د نوموړو چکډمونو چارې چې د اوبو او انرژي وزارت له پراختیایي بودجې څخه د غور سیندیزې فرعي حوزې تر څارنې لاندې پرمخ وړل کېدې، د 4000 متر مکعب اوبو د زېرمه کولو وړتیا لري چې د پلي کولو موخه یې د سیلابونو کنټرول او د ګواښونو کمول، د موسمي اوبو راټولول او د ځمکې لاندې اوبو تغذیه ده.
د یادونې وړ ده، چې په نوموړو پروژو کې سلګونو کسانو ته د کار زمینه چمتو شوې وه او څه باندې زر کورنۍ ورڅخه ګټه پورته کوي.