لغمان ولایت کې د لټر آباد کانال د سربند رغنیزې چارې د څه باندې ۹ میلیونه افغانیو په لګښت پیل شوې
د لغمان ولایت په دولت شاه ولسوالي کې د لټر آباد کانال د سربند رغنیزې چارې د ۹ میلیونه، ۳۶ زره او ۳۷۸ افغانیو په لګښت د لغمان د اوبو او انرژي رئيس محترم مولوي شیرجان راشدي او قومي مشرانو په شتون کې پيل شوې.
د نوموړي کانال سربند د ۲۰ متره اوږدوالي او ۱۱ متره سور په درلودلو سره د ۹۰ هکتاره کرنیزې ځمکې د خړوبولو وړتیا لري.
په دغه پروژه کې ګڼ شمېر خلکو ته د کار زمینه چمتو شوې او چارې به یې د درې میاشتو په موده کې بشپړې او ګټې اخیستنې ته وسپارل شي.
د نوموړې پروژې چارې د ډبلیو. اف. پي سازمان په مالي لګښت د لغمان د اوبو او انرژي ریاست تر څارنې لاندې پرمخ وړل کېږي.
د یادونې وړ ده، چې نن د لغمان ولایت په قرغه يي ولسوالي کې د اوبو ذخیرو ۱۹ پروژو رغنیزې چارې هم د څه باندې ۴۹ میلیونه افغانیو په لګښت پیل شوې.
