لغمان ولایت کې د یوه ساتندوی دېوال پروژې د رغونې چارې د څه باندې ۱۰۰ زره آمریکایي ډالرو په لګښت پيل شوې
د لغمان ولایت د قرغیو ولسوالي اړوند د زیړانیو کلي ساتندوی دېوال پروژې د رغونې چارې د ۱۱۳ زره آمریکایي ډالرو په لګښت دلغمان والي محترم قاري بختیار معاذ، د لغمان سیندیزې فرعي حوزې رئيس محترم مولوي شیرجان راشدي، د اېف، اې، او موسسې مسؤلینو او یو شمېر سیمهایزو مسؤلینو په شتون کې پيل شوې.
د دغې پروژې په پرانیست غونډه کې د لغمان والي او ښاغلي راشدي د هغې د ټولنیزې او اقتصادي ګټو او په راتلونکي کې د پراختیایي پروژو بهیر د پليکولو په هکله اړین معلومات وړاندې کړل.
نوموړې پروژه ۷۰۰ متره اوږدوالی لري، چې چارې یې د اېف، اې، او موسسې په مالي لګښت د لغمان سیندیزې فرعي حوزې ریاست تر څارنې لاندې پرمخ وړل کېږي، چې چارې به یې د پنځو میاشتو په موده کې بشپړې او ګټې ته په سپارلو سره به یې کرنیزې ځمکې او استوګنیز کورونه تر یوه بریده د سیلابونو له ګواښونو څخه خوندي شي.
