لوګر ولایت کې د دريو کانالونو د پروژو چارې د نږدې دوسوه زره آمریکایي ډالرو په لګښت پیل شوې
د لوګر ولایت د مرکز او محمد آغې ولسوالي اړوند د مغل خېلو، لشکري خېلو او حسن خېلو کانالونو د پروژو چارې د ۱۹۸ زره او ۶۸ آمریکايي ډالرو په لګښت د لوګر والي محترم ضیا الرحمن مدني، د کابل سیندیزې حوز عمومي رئیس محترم انجنیر محمد عارف مومند، د لوګر د سیندیزې فرعي حوزې رئيس محتر ملا محمد اسماعیل آخندزاده او د دغه ریاست د سلاکار او یو شمېر نورو مسؤلینو په شتون کې پيل شوې.
د نوموړو پروژو په پرانیست غونډه کې د کابل سیندیزې حوزې عمومي رئيس د دغو پروژو په هکله هر اړخیز معلومات وړاندې کړل.
د دغو پروژو د چارو په بشپړېدو سره به ۸۵۰۰ هکتاره ځمکه خړوبه او ۱۰۰۰ کسانو ته د کار زمینه چمتو شوې ده.
د نوموړو پروژو چارې د یو، این، ایف، او موسسې په مالي لګښت د لوګر د سیندیزې فرعي حوزې تر څارنې لاندې پرمخ وړل کېږي.
