په زابل ولایت کې د یوه ګبیوني دېوال د چارو له بهیر څخه څارنه ترسره شوه
د اوبو او انرژي وزارت د څارنې او ارزونې رئيس محترم مولوي حمیدالله دلاور د زابل ولایت د شهر صفا ولسوالي اړوند د بامیزو په سیمه کې د خوړ د څنډو د ویجاړېدو د مخنیوي په موخه د یوه ګبیوني دېوال د چارو له بهیر څخه څارنه وکړه او اړوندو مسؤلینو ته په دې برخه کې اړین هدایات ورکړل.
دغه پروژه چې نږدې یو کیلو متر اوږدوالی لري، چارې یې د ترنک قلات سیندیزې فرعي حوزې تر څارنې لاندې د اف. اې . او سازمان په مالي ملاتړ پرمخ وړل کېږي او په بشپړېدو سره به یې ګڼ شمېر کرنیزې ځمکې او استوګنیز کورونه د سیلابونو له ګواښ څخه خوندي شي.
