په فراه، پکتیکا او ارزګان ولایتونو کې به ډېر ژر د لمریزې برېښنا د درېو پروژو چارې پيل شي
د اوبو او انرژي سرپرست وزیر محترم الحاج ملا عبداللطیف منصور په یوه ناسته کې د عوفي بهرام شرکت له استازي سره په فراه، پکتیکا او ارزګان ولایتونو کې د لمریزې برېښنا پروژو د پلي کولو په هکله خبرې، اترې وکړې او ټينګار یې وکړ، چې ژر تر ژر دې د دغو پروژو قراردادونه لاسلیک او چارې دې پيل شي.
په ورته مهال، د انرژي برنامو تخنیکي مسؤلینو او د نوموړي شرکت استازو په فراه، ارزګان او پکتیکا ولایتونو کې د نوموړو پروژو د پلي کولو لپاره خپل چمتووالی څرګند کړ او یادونه یې وکړه، چې نوموړې پروژې د قرارداد لپاره چمتو دي.
د یادونې وړ ده، چې اوسمهال د دغه وزارت څو سترې پروژې د نوموړي شرکت په پانګونې سره پرمخ وړل کېږي، چې له هغې ډلې څخه د نغلو ۱۰ میګاواټه لمریزه پروژه بشپړه او ګټې اخیستنې ته چمتو ده.
همدغه راز، د نوموړي شرکت استازي څرګنده کړه، چې لېواله دی په کابل کې تر ۱۰۰ میګاواټه لمریزې برېښنا د تولید په بله پروژه کې هم پانګونه وکړي.
