په کاپیسا ولایت کې د اوو پروژو چارې څه د پاسه 270 زره آمریکایي ډالرو په ارزښت پیل شوې
په کاپیسا ولایت کې د اوبو سرچینو د پروژو ودانیزې چارې د دوه سوه اویا زره او نهه سوه پنځوس (270,950) آمریکایي ډالرو په ارزښت د کاپیسا مرستیال والي محترم شیخ اسدالله سنان، د کاپیسا سیندیزې فرعي حوزې رئيس محترم انجنیر کاوه خروش او د دغه ولایت د یو شمېر نورو سیمه ییزو مسؤلینو په شتون کې پیل شوې.
دغه د ګبیوني دیوالونو د جوړولو او د سیند څنډو د تحکیماتو سنګ کاري پروژې د کاپیسا ولایت په آله سای او تګاب ولسوالیو کې پلي کېږی، چې د چارو په بشپړېدو سره به یې کرنیزې ځمکې او استوګنیزکورونه د سیلابونو له ګواښ څخه خوندي شي او د اوبو د سرچینو د مدیریت په برخه کې اړین رول لري.
د نوموړو پروژو چارې د اف اې او سازمان په مالي ملاتړ د کاپیسا کهنه ده ودانیز شرکت له لوري د کاپیسا سیندیزې فرعي حوزې تر څارنې لاندې پرمخ وړل کېږي.
