پکتیکا ولایت کې د شیرګل چکډم پروژه د نږدې13 میلیونه افغانیو په لګښت بشپړه شوه
د پکتیکا ولایت په شخیل آباد ولسوالي کې د شیرګل چکډم پروژه د 12 میلیونه، 953 زره او 625 افغانیو په لګښت بشپړه او د پکتیکا د اوبو او انرژي ریاست د مسؤلینو، د نوموړې ولسوالي د ولسوال او یو شمېر قومي مشرانو په شتون کې ګټې اخیستنې ته وسپارل شوه.
نوموړی چکډم د 120 متره په اوږدوالي او 9 متره لوړوالي سره د 100 زره متره مکعب اوبو د زېرمه کولو، او 1200 جریبه ځمکې د خړوبولو وړتیا لري، چې ګټې ته په سپارلو سره به یې د ځمکې لاندې اوبه پیاوړي او د اوبو په برخه کې تر ډیره بریده شته ستونزې هوارې شي.
د نوموړې پروژې چارې د اوبو او انرژي وزارت په مالي لګښت د پکتیکا د اوبو او انرژي ریاست تر څارنې لاندې پرمخ وړل کېدې.
