پکتیکا ولایت کې د ګیناوې چکډم چارې د څه باندې دوه میلیونه افغانیو په ارزښت پيل شوې

د پکتیکا ولایت په اومنې ولسوالي کې د ګیناوې چکډم چارې د دوه میلیونه، دوه سوه اووه نوې زره، څلور سوه او درې شپېته اعشاریه اته نوې(2297463.98) افغانیو په ارزښت د ګوملې سیندیزې فرعي حوزې د مسؤلینو په شتون کې پيل شوې.

دغه چکډم د 30 متره اوږدوالي، د بنسټ په برخه کې د 4.10 متره پلنوالي او په پورتنۍ برخه کې د 0.9 متره په پلنوالي سره جوړیږي، چې د چارو په بشپړېدو سره یې به د 37343 متره مکعب اوبو د ذخیره کولو وړتیا ولري.

نوموړی چکډم د اوبو او انرژي وزارت له لوري د اکرام عثمان ودانیز او لوژستیکي شرکت سره قرارداد شوی او په ټاکلي وخت کې به یې چارې بشپړې شي.