کرنیزو اوبو ته د لاسرسي په برخه کې د غور ولایت د خلکو اړتیاوې په لویدیځ زون کې د ملګرو ملتونو سازمان د پروژو چوپړتیاوو دفتر له استازي سره شریکې شوې
د غور ولایت د اوبو او انرژي رئيس محترم ملا رحمت الله اماني په لویدیځ زون کې د ملګرو ملتونو سازمان د پروژو چوپړتیاوو دفتر له استازي محترم حبیب الله لایح سره وکتل او په دغه ولایت کې د اوبو پروژو د پلي کولو په هکله بحث او د اندونو تبادله وکړه.
په دغه لیدنه کې، ښاغلي اماني د غور ولایت د اوبیز وضعیت په هکله د خبرو ترڅنګ، کرنیزو اوبو ته د دغه ولایت د خلکو د لاسرسي ستونزې د نوموړي دفتر له استازي سره شریکې کړې.
په ورته مهال، ښاغلي لایح د خپل کاري پلان په هکله خبرې وکړې او د ۳۴ اوبیزو اراضي پروژو د پلي کولو په هکله چې د سولر پمپ په وسیله په غور ولایت کې ټاکل شوې دي، د همکاري ژمنه وکړه.
