اوبو او انرژي وزارت کې د اوبو د مدیریت او سپما په اړه د عامه پوهاوي پروګرام ترسره شو
د اوبو د مدیریت او سپما په اړه د عامه پوهاوي پروګرام په دوهمه ورځ، په اسلامي شریعت کې د اوبو د ارزښت او د اوبو د سپما د لارو چارو په اړه خبرې وشوې .
په یاد پروګرام کې، چې د اوبو او انرژي وزارت سلګونو کارکوونکو ګډون درلود، د اوبو او انرژي وزارت د انرژي معینیت د دفتر آمر ښاغلي مولوي بسم الله حیدري په اسلامي شریعت کې د اوبو د ارزښت او سپما په اړه خبرې وکړي او د یاد وزارت کاروونکي یې د اوبو سپما ته وهڅول.
د یادې غونډې په دوام کې، د هایدروجیوجیکي شبکو د ساتني، پالنې او پراختیا آمر ښاغلي انجنیرعبدالعلیم مُخبت د ځمکې لاندې اوبو د وضعیت، د اوبو د کمښت د لاملونو او د اوبو د سپما د لارو چارو په اړه د یوه پرزنټیشن په ترڅ کي د اړتیا وړ معلومات له ګډونوالو سره شریک کړل.
د یادولو وړ ده چې، د اقلیمي بدلونونو، د نفوس د ډیروالي او د ځمکې لاندې اوبو څخه په ناسمه توګه ګټې اخیستنې له کبله په ځانګړي ډول د هېواد لوی ښارونه د اوبو له کمښت سره مخ دی، چې له همدي کبله د اوبو او انرژي وزارت د اوبو د سرچینو د مدیریت، د مصنوعي تغذیې او د اوبو د سپما په اړه بېلابېل پروګرامونه تر لاس لاندې نیولي، ترڅو د اوبو د اسراف او بې ځایه ګټې اخیستنې څخه مخنیوی وشي.
