بلخ ولایت کې د آمو سیند د انشعابي چینلونو د بندولو پروژه پیل شوه
د بلخ ولایت د شورتپې ولسوالي اړوند د پتلي ایلاق په سیمه کې د آمو سیند د انشعابي چینلونو د بندولو پروژې چارې د آمو سیند څنډو د ټینګښت ریاست د ماشینرۍ، مالي امکاناتو او تخنیکي ټیم په ذریعه د بلخ والي محترم الحاج ملا محمد یوسف وفا او د سیمې د خلکو په مالي همکاري د حیرتان سیمهایز دفتر د ټینګښت آمر، د شورتپې ولسوالي د ولسوال او امنیه قوماندان او یو شمېر قومي مشرانو په شتون کې پیل شوې.
د دغې ناستې په بهیر کې، د آمو سیند څنډو د ټینګښت، د انشعابي چینلونو د بندولو، د کرنیزو ځمکو د ویجاړیو د مخنیوي او د سیند شاوخوا سیمو د ساتنې د ارزښت په هکله اړین معلومات وړاندې شول او د سیند څنډو د ټینګښت د ویجاړیو او د سیمې د کرنیزو ځمکو د ساتنې په برخه کې د دغې پروژې پر رول باندې رڼا واچول شوه.
د دغې پروژې په پلي کېدو سره به لسګونه جریبه ځمکه د سیند له بستر څخه ووځي او په کرنیزو ځمکو بدلېږ او لسګونه جریبه نورې کرنیزې ځمکې د آمو سیند له ویجاړیو څخه خوندي شي.
