د اوبو او انرژي وزارت ۷۵ کارمندانو ته ستاینلیکونه ورکړل شول
د اوبو او انرژي وزارت ۷۵ هغو کارمندانو لپاره د ستاینلیکونو د وېش پروګرام چې د بشري سرچینو په درې ورځنې ښوونیز پروګرام کې چې د اداري پېژندنې، ادارې مراسلاتو، مقررو او د سلوک ډول کې ګډون کړی وو، د وزارت د مقام د دفتر عمومي رئيس ښاغلي قاري محمد عبدالعزیز عزیز، د مالي او اداري عمومي رئيس ښاغلي حاجي محمدالدین نیازي، د بشري سرچینو رئيس ښاغلي ملا اسدالله کاکړ، د اطلاعاتو او نشراتو رئيس ښاغلي حاجي غلام جیلاني حق پرست او د وزارت د یو شمېر نورو آمرینو په ګډون ترسره شوه.
په یاد پروګرام کې، د وزارت د مقام د عمومي دفتر رئيس ښاغلي قاري محمد عبدالعزیز عزیز د وزارت د کارمندانو د وړتیا د لوړولو په هکله هر اړخیزه وینا وکړه او ټینګار یې وکړ چې د اوبو او انرژي وزارت رهبري په شته امکاناتو باندې هڅه کوي چې د وزارت د کارمندانو وړتیا لوړه کړې.
په دې پروګرام کې، د مالي او اداري عمومي رئيس ښاغلي حاجي محمدالدین نیازي د وزارت د کارمندانو د وړتیا د لوړولو لپاره د لا زیاتو ښوونیزو پروګرامونو په جوړولو باندې ټینګار وکړ او زیاته یې کړه چې دا ډول پروګرامونه باید په پراخه کچه ترسره شي.
په ورته وخت کې، د اطلاعاتو او نشراتو رئيس ښاغلي حاجي غلام جیلاني حق پرست په یاد پروګرام کې د تېر حکومت له خوا د هېواد مختصصانو ته د صلاحیت د نه ورکولو ته په ا شارې سره ټینګار وکړ چې اوس د اسلامي امارت حکومت زیاتره کاري صلاحیتونه ټولو کارمندانو ته ورکړی، ترڅو دوی وکولای شي د هېواد په آبادۍ کې د خپلو وړتیاو څخه کار واخلي. هغوی د ټولو کارمندانو څخه و غوښتل چې ورسپارل شوي دندې په ښه توګه پرمخ یوسي.
غونډه په یاد روزنیز او ظرفیت لوړولو په پروګرام کې برخه اخیستونکو کارمندانو ته د تصدیق پاڼو په ورکولو سره پای ته ورسېده.
