د آمو سیند د څنډو د وضعیت د څېړنې او د هغه د تحکیماتو لپاره د اړینو تدابیرو د نیولو په موخه د همغږي ناسته ترسره شوه
یاده ناسته د اوبو او انرژي وزارت د اوبو معین ښاغلي مجیب الرحمن عمر آخندزاده تر مشري لاندې د رئيسانو، سلاکارانو او د وزارت د تخنیکي انجنیرانو په ګډون د یاد معینیت د غونډو په تالار کې ترسره شوه.
په دې ناسته کې، د اوبو ښاغلي معین د خپل هغه سفر په هکله چې څه موده وړاندې له هغه پلاوي سره چې د کرنې،مالداري او اوبولګولو وزارت، د طبیعي پېښو په وړاندې د مبارزې وزارت، د سرحدونو او قبایلو چارو وزارت ، د کانونو او پټرولیم وزارت له استازو او د احصائیې او معلوماتو عمومي رئيس یې په ترکیب وو، چې د آمو سیند د ویجاړشویو ساحو د څېړلو لپاره تللی و، معلومات وړاندې کړل او د خپلو څېړنو پایلې یې د غونډې له ګډونوالو سره شریکې کړې.
د ناستې په دوام کې، د آمو سیند د ویجاړ شویو ساحو د کار او د بیارغونې کارونو د پيلولو په هکله بحث او د اندونو تبادله وشوه او ښاغلي مجیب الرحمن عمر آخندزاده د آمو سیند د چارو د پیلولو په پار یې د کاري پلان د چمتوکولو د چارو د چټکتیا په هکله اړینې سپارښتنې وکړې.
