د افغانستان اسلامي امارت د اوبو او انرژي وزارت د اوبو معین، محترم مجیب الرحمن عمر آخندزاده، د ازبکستان په پلازمېنه تاشکند کې “د اوبو اونۍ” تر عنوان لاندې د وزیرانو په کچه مهم فورم کې ګډون وکړ او د افغانستان په استازیتوب یې هراړخیزه وینا وړاندې کړه.
۷ / شوال / ۱۴۴۷ هـ ق
۵/ حمل / ۱۴۰۵ هـ ش
څلورنۍ
ښاغلي آخندزاده په خپله وینا کې د افغانستان او د منځنۍ اسیا هېوادونو ترمنځ د اوبو د عادلانه وېش پر اهمیت، د اوبو ډیپلوماسي د پیاوړتیا، د اوبو د مدیریت په برخه کې د نوې ټکنالوژي پر کارونې، او د اقلیمي بدلونونو د اغېزو پر وړاندې د ګډو همکاریو پر اړتیا ټینګار وکړ. نوموړي همدارنګه د آمو سیند د سواحلو د تخریب د مخنیوي په اړه خبرې وکړې او څرګنده یې کړه چې اسلامي امارت د اوبو د مدیریت په برخه کې د ګاونډیو هېوادونو حقوقو ته ژمن دی.
په همدې ترڅ کې، محترم آخندزاده د فورم په څنډه کې د ازبکستان د اوبو له وزیر شوکت خمرایف سره هم کتنه ترسره کړه او د دواړو هېوادونو ترمنځ یې د اوبو په برخه کې د همکاریو پر پراختیا خبرې وکړې.
دا ګډون د افغانستان لپاره یو مهم ګام بلل کېږي، چې له لارې یې هېواد کولی شي په نړیوالو او سیمهییزو بحثونو کې خپل حضور لا پیاوړی کړي او د متقابلو همکاریو نوی فصل پرانیزي.
