د انرژي معینیت اونیزه تخنیکي او اداري ناسته ترسره شوه
دغه ناسته د انرژي معین محترم الحاج ملا عبدالهادي یعقوب تر رهبري لاندې د انرژي سکتور د رئيسانو، سلاکارانو او تخنیکي مسؤلینو په شتون کې نن سه شبنې د غبرګولي په ۲۷ نېټه د دغه معینیت د غونډو په تالار کې ترسره شوه.
په دغه ناسته کې په چارو کې انسجام، اړینو همغږیو او د انرژي پروژو غوره مدیریت تر بحث لاندې ونیول شول.
په دغه ناسته کې، د بحث د اصلي محورونو له ډلې څخه د انرژي پنځه کلن پراختیایي پلان نوی کول، له خواجه الوان دښتې څخه د کابل تر ارغندۍ پورې د ۵۰۰ کیلو ولټ مزي د تطبیقي چارو چټکتیا او د ستونزو هوارول او همدارنګه د بدخشان انرژي اړوند اړین مسائل وو.
اړوندو مسؤلینو د انرژي پنځه کلن پراختیايي پلان د نوي کولو په هکله راپور ورکړ، چې د معینیت د ټولو رئيسانو او کارپوهانو اندونه را ټول شوي او نوموړی پلان د تائید لپاره د اسلامي امارت اقتصادي کمېسیون ته لېږل شوی او د دغه کمېسیون تر تائید وروسته به نوموړی پنځه کلن پلان نوی شي.
همدارنګه، د ۵۰۰ کیلو ولټ مزي پروژې د پرمختګ په هکله اشاره وشوه، چې د دغې پروژې ټولنیزې ستونزې نژدې هوارې شوې او مدیریت یې په اغېزمنه توګه پرمخ ځي او تمه کېږي چې د دغې پروژې د مزي غځولو چارې ډېر ژر د ایم، بي، سي، سي قراردادي شرکت له لوري په سیمه کې پیل شي.
د ناستې په دوام کې، د بدخشان انرژي اړوندو اړینو موضوعاتو په هکله هم مفصلې خبرې، اترې وشوې او د چارو پرمختګ د چټکتیا په هکله اړین تصمیمونه ونیول شول.
دغه ناسته پر لا زیاتې همغږي او د انرژي پروژو د چارو د غوره ترسره کولو په ټینګار سره پای ته ورسېده.
