د اوبو او انرژي سرپرست وزیر د ارزګان له والي سره وکتل
د اوبو او انرژي سرپرست وزیر محترم الحاج ملا عبداللطیف منصور د ارزګان له والي محترم الحاج مولوي عنایت الله شجاع سره وکتل او په هغه ولایت کې یې د اوبو او انرژي پروژو په هکله خبرې، اترې وکړې.
په دغه لیدنه کې، د ارزګان والي د اوبو او انرژي پروژو د اړتیا په برخه کې د خلکو ستونزې او وړاندیزونه په ځانګړې توګه په هغه ولایت کې د آغاجان بند پروژه د وزارت د رهبري مقام سره شریکه کړه.
د اوبو او انرژي سرپرست وزیر د ارزګان والي ته ډاډ ورکړ، چې د آغاجان بند تخنیکي چارې پای ته رسېدلې او ودانیزې چارې به یې هم ډېر ژر پرانیستل شي. هغه زیاته کړه، همدارنګه ټاکل شوې ده، چې په هغه ولایت کې د عوفي بهرام شرکت په پانګونې سره د پنځه میګاواټه په وړتیا د لمریزې برېښنا پروژې پرانیسته هم وشي.
