د اوبو او انرژي سرپرست وزیر د شاه توت(للندر) بند له سیمې څخه لیدنه وکړه
د اوبو او انرژي سرپرست وزیر محترم ملا عبداللطیف منصور د دغه وزارت له یو شمېر رئیسانو او تخنیکي مسؤلینو سره د شاه توت (للندر) د اوبو لګولو او برېښنا د تولید بند له سیمې څخه لیدنه وکړه.
د اوبو او انرژي سرپرست وزیر د نوموړي بند له سیمې څخه د لیدنې پرمهال د هغه ارزښت د کابل ښاریانو لپاره حیاتي وګاڼه او ټینګار یې وکړ، چې اړینې هڅې ترسره کېږي؛ ترڅو ډېر ژر د هغه د ودانیزو چارو د پلي کولو لپاره زمینه چمتو شي.
د شاه توت (للندر) د اوبو لګولو او برېښنا د تولید بند د اوبو او انرژي وزارت له سترو پروژو څخه ده چې د کابل په چهار آسیاب ولسوالي کې د څښاک اوبو د چمتو کولو، د کرنیزو ځمکو د خړوبولو او د برېښنا انرژي د تولید په موخه په لاره اچول شوې ده.
نوموړی بند د ۹۲ مترو په لوړوالي سره د ۱۴۶ میلیون متره مکعب اوبو د ذخیره کولو وړتیا لري، چې د ګڼ شمېر کابل ښاریانو لپاره د څښاک اوبو پر برابرولو برسېره به ، کابو ۲۰۸۰ ( دوه زره او اتیا) هکتاره کرنیزه ځمکه تر خړوبولو لاندې راشي او څه د پاسه دوه میلیونه خلک به ورڅخه برخمن شي.
