د اوبو او انرژي سرپرست وزیر د علماوو او حفاظ کرامو په فراغت غونډه کې ګډون وکړ .
د اوبو او انرژی سرپرست وزیر محترم الحاج ملا عبداللطیف منصور د پکتیا ولایت د زرمت ولسوالي د سهاکو حیدري کلا د جامعه حضرت عبدالله ابن عباس رض د علماوو او حفاظ کرامو په فراغت غونډه کې ګډون او وینا وکړه .
محترم وزیر صاحب د خپلې وینا په ترڅ کې د دیني او عصري علومو او قرانکریم د حفظ او فضیلت د بیانولو تر څنګ د یادې غونډې برخه وال وهڅول چې خپل اولادونه په دیني او عصري علومو سمبال کړي تر څو دین او هیواد ته د ښه خدمت مصدر وګرزي.
هغه دغه راز په ټولنه کې د علماوو د اهمیت او مسئولیت په هکله مفصلې خبرې وکړې او دوی یې خپل درانۀ دیني او هیوادني مسئولیت ته متوجه کړل .
ښاغلي وزیر صاحب د سیمې خلکو ته سپارښتنه وکړه چې په سیمه کې د ناسمو دودونو د له منځه وړلو په هکله چې کوم قومي تړون شوی دی، هغه باید په کلکه سره عملي کړي ،تر څو زموږ ځوانان د ودونو لپاره د مهر د پیسو د پیدا کولو لپاره په خطرناکو قاچاقي لارو بهرنیو هېوادونو ته له سفر کولو او ستونزو ګاللو څخه خوندي شي.
غونډه علماوو او حفاظ کرامو ته د فضیلت دستارونو ورپه سر کولو او د دعائیې په لوستلو سره پای ته ورسېده .
