د اوبو او انرژي سرپرست وزیر د ملي پراختیا شرکت له عمومي رئيس سره په لیدنه کې د دغه وزارت د پروژو د چارو پر چټکتیا باندې ټینګار وکړ
د اوبو او انرژي سرپرست وزیر محترم الحاج ملا عبداللطیف منصور د خپل کار په دفتر کې د ملي پراختیا شرکت له عمومي رئيس محترم عبدالرحمن عطاش سره وکتل.
په دغه لیدنه کې، د اوبو بندونو په ځانګړې توګه د پلتوني بند، آغاجان بند، شفلوغ بند، سلطان ابراهیم بند او د هلمند ولایت د نهر سراج کانال پروژو جوړولو د پلي کولو په هکله بحث او د اندونو تبادله ترسره شوه.
د اوبو او انرژي سرپرست وزیر د دغو پروژو حیاتي ارزښت ته اشاره وکړه او ټینګار یې وکړ، چې د تر کار لاندې پروژو چارې دې ګړندۍ شي او هغه پروژې چې چارې یې د پيل په پړاو کې دي، هم ډېر ژر دې په عملي توګه پيل شي.
په ورته مهال، د ملي پراختیا شرکت عمومي رئيس هم ژمنه وکړه، چې نوموړی شرکت به د دغه وزارت د پروژو د چټکتیا په برخه کې د خپلو ټولو هڅو او امکاناتو څخه ګټه پورته کړي.
