د اوبو او انرژي سرپرست وزیر د نیکمرغه کوچني اختر د مبارکې په مناسبت د اسلامي امارت له یو شمیر مسئولینو او د اوبو او انرژي وزارت له رئیسانو او کارمندانو سره وکتل
د اوبو او انرژي سرپرست وزیر محترم الحاج ملا عبداللطیف منصور په دغو لیدنو کې د اسلامي امارت یو شمیر لوړپوړو مسئولینو او د اوبو او انرژي وزارت رئیسانو او کارمندانو ته د نیکمرغه کوچني اختر د رارسېدو په مناسبت مبارکي وړاندې کړه او د څښتن تعالی له دربار څخه یې د ټولو مسلمانانو د طاعاتو او عباداتو د قبولي غوښتنه وکړه.
د اوبو او انرژي سرپرست وزیر د خپلو خبرو په ترڅ کې د بندګۍ او نفس د تزکیې په برخه کې د روژې مبارکي میاشتې او کوچني اختر فضیلتونو ته په اشارې سره ټول مسئولین او کارمندان ایماندارۍ، اخلاص، ژمنتیا او مسئولیت پذیري ته وهڅول او ولس ته د ریښتینې خدمت رسونې په موخه یې اړینې لارښوونې وکړې.
ښاغلي منصور په هېواد کې د اسلامي نظام حاکمیت یو ستر الهي نعمت وباله او ددغه نظام ملاتړ یې د مسئولینو، علماوو او ټول مسلمان او مجاهد ولس دنده وبلله او ټینګار یې وکړ، چې د افغانستان مسلمان ولس باید تل د دښمن د دسیسو پر وړاندې ویښ و اوسي او د مقابلې لپاره یې په علمي او شعوري توګه خپلوهڅو ته دوام ورکړي.
