د اوبو او انرژي سرپرست وزیر د هرات ولایت د پروژو په هکله د هغه ولایت له مرستیال والي او د سیندیزې فرعي حوزې له رئيس سره خبرې وکړې
د اوبو او انرژي سرپرست وزیر محترم الحاج ملا عبداللطیف منصور د اطلاعاتو او کلتور وزارت د نشراتو له معین او د هرات له مرستیال والي محترم حیات الله مهاجر فراهي او د هریرود- مرغاب سیندیزې فرعي حوزې له رئيس محترم مفتي سردار ولي مزمل سره وکتل.
په دغه لیدنه کې، د هرات ولایت د اوبو او برېښنا پروژو په ځانګړي توګه د پاشدان برېښنا بند په هکله بحث او د اندونو تبادله وشوه.
د اوبو او انرژي سرپرست وزیر د هرات مرستیال والي او د هرات د سیندیزې فرعي حوزې رئيس ته ډاډ ورکړ، چې د دغه وزارت له لوري په هرات ولایت کې د اوبو او برېښنا پروژو د پلي کولو په موخه اړینې هڅې ترسره شوې او له دې وروسته هم هڅه کېږي، چې د شته امکاناتو په پام کې نیولو سره به اړین اقدامات ترسره شي او د پاشدان بند پاتې چارې به په نږدې راتلونکي کې پيل شي.
