د اوبو او انرژي سرپرست وزیر د پکتیا ولایت د روحاني بابا ولسوالي له قومي مشرانو سره وکتل
د اوبو او انرژي سرپرست وزیر محترم الحاج ملا عبداللطیف منصور د روحاني بابا ولسوالي له قومي مشرانو سره وکتل او له هغوی سره یې په هغه ولسوالي کې د اوبو او انرژي پروژو د پلي کولو په هکله خبرې وکړې.
په دغه لیدنه کې، د روحاني بابا ولسوالي قومي مشرانو خپلې ستونزې او وړاندیزونه د اوبو او انرژي له سرپرست وزیر سره شریک کړل او د برېښنا رسونې پروژې د پلي کولو، د ګاویان بند د جوړولو پروژې او په هغه ولسوالي کې د چکډمونو پروژو د پلي کولو غوښته یې وکړه.
د اوبو او انرژي سرپرست وزیر په دغه لیدنه کې، د هغه ولسوالي د خلکو د سرښندونو او اتلولیو ستاینه وکړه او یووالي او خواخوږي ته د هغوی د هڅولو ترڅنګ ډاډ ورکړ، چې د شته امکاناتو په پام کې نیولو سره به د دغه وزارت له لوري د دوی وړاندیزونو ته رسیدګي وشي.
