د اوبو او انرژي سرپرست وزیر په لغمان ولایت کې د شاهي کانال پروژې د کار له پرمختګ څخه لیدنه وکړه
د اوبو او نرژي سرپرست وزیر محترم الحاج ملا عبداللطیف منصور او ور سره مل د لغمان والي محترم شیخ شیراحمد حقاني په الینګار ولسوالي کې د شاهي کانال پروژې د کار له پرمختګ څخه لیدنه وکړه.
اوسمهال په سیمه کې د نوموړې پروژې د لومړۍ برخې چارې ښې روانې دي او په ټوله کې کابو ۶ سلنه پرمخ تللې دي.
د اوبو او انرژي سرپرست وزیر په دغه لیدنه کې د چارو د چټکتیا پر اړتیا، د پروژې د غوره کیفیت او پر وخت باندې د چارو پر بشپړېدو باندې ټینګار وکړ.
ښاغلي منصور د دغې پروژې د حیاتي ارزښت یادونه وکړه او د قراردادي شرکت له مسؤلینو څخه یې وغوښتل چې د پروژې چارې چټکۍ کړي.
د یادونې وړ ده، چې شاهي کانال په دوو فازونو کې طراحي شوی او په ټوله کې ۷۰ کیلو متر اوږدوالی لري، او د چارو تر بشپرېدو وروسته کابو ۲۰ زره هکتاره ځمکه خړوبوي.
د دغې پروژې لومړی فاز ۳۰ کیلو متره اوږدوالی لري او په څلورو برخو کې ترسره کېږي چې لومړی فاز یې ۶.۶ کیلو متره دی او تر بشپړېدو وروسته، پنځه زره هکتاره ځمکه به خړوبه کړي.
دغه پروژه د هېواد د اوبو مدیریت او د کرنې د پراختیا په برخه کې د اوبو او انرژي وزارت یو له مهمو پروژو څخه ګڼل کېږي.
له بلې خوا، د اوبو او انرژي سرپرست وزیر محترم الحاج ملا عبداللطیف منصور په یوه بېله ناسته کې د لغمان له والي محترم شیخ شیراحمد حقاني او د دغه ولایت د اوبو او انرژي له رئيس سره په نوموړي ولایت کې د اوبو او انرژي پروژو د پلي کولو په هکله بحث او د اندونو تبادله وکړه.
