د اوبو او انرژي وزارت او د کلیو او پراختیا وزارت د مسؤلینو ترمنځ د همغږي ناسته ترسره شوه
دا ناسته چې د دواړو وزارتونو ترمنځ د اوبو پروژې د پلي کیدو په برخه کې د لازیاتو همغږیو په موخه جوړه شوې وه، د معلوماتو شریکولو، د پروژو د مدیریت او تنظیم په هکله او د ټولو اړوندو ادارو ترمنځ د همغږي په رامنځته کولو باندې بحث او د نظر تبادله وشوه.
په یاده ناسته کې، د کلیو او پراختیا وزارت مسؤلینو د خپلو اجراآتو په هکله د اوبو رسولو او چاپېریالي پاکوالي په اړه لازم معلومات وړاندې کړل او د دواړو وزارتونو مسؤلینو هوکړه وکړه، چې د معلوماتو د شریکولو او د اوبو پروژو د مدیریت په برخه کې یو د بل سره همکاري وکړي.
په پای کې، د دواړو وزارتونو مسؤلینو د همغږي ناستو په دوام باندې ټینګار وکړ؛ او تصمیم ونیول شو، چې یوه ګډه کميټه رامنځته شي او د اوبو د تنظیم قانون سره سم د ټولو وزارتونو او اړوندو ادارو ترمنځ د همکاري هوکړه لیک لاسلیک شي؛ ترڅو د اوبو د مدیریت په برخه کې ټولې کړنې په منظمه توګه پرمخ یووړل شي.
