د اوبو او انرژي وزارت د انرژي معین د یوه پلاوي په مشري پکتیکا ولایت ته د برېښنا ستونزو د هوارولو په موخه سفر وکړ
د اوبو او انرژي وزارت د انرژي معین ښاغلي ملا محمد عیسی ثاني د یوه پلاوي په مشري پکتیکا ولایت ته د لس میګاواټه لمریزې برېښنا پروژې د څېړلو او د یاد ولایت د برېښنا د ستونزو د هوارولو په موخه سفر وکړ.
د انرژي معین په دې سفر کې، د یاد ولایت له والي ښاغلي مولوي عبدالله مختار، د ګوملې سیندیزې فرعي حوزې له رئيس ښاغلي قاري فتح محمد ذاکر او د یاد ولایت له یو شمېر سوداګرو سره وکتل.
د یاد ولایت والي، د ګوملې سیندیزې فرعي حوزې رئيس او سوداګرو د پکتیکا ولایت د برېښنا ستونزې او د خلکو غوښتنې د برېښنا رسولو پروژو په برخه کې د انرژي له معین سره شریکې کړې.
د انرژي معین په یاد ولایت کې د برېښنا شته ستونزو تر آورېدو وروسته د یاد ولایت له والي، سیندیزې فرعي حوزې رئيس او سوداګر سره ژمنه وکړه چې په یاد ولایت کې د برېښنا په برخه کي شته ستونزې به د برېښنا شرکت له مسؤلینو او د وزارت له رهبري سره شریکې کړې، ترڅو د برېښنا په برخه کې شته ستونزې ژر تر ژره هوارې شي.
همدارنګه د انرژي ښاغلي معین وویل چې په یاد ولایت کې د ۱۰ میګاواټه لمریزې برېښنا پروژه به ډیر ژر اعلان ته و سپارل شي او د یاد ولایت له سوداګرو څخه یې وغوښتل چې د انرژي د تولید پروژو په برخه کې پانګونې وکړي.
