د اوبو او انرژي وزارت د اوبو معین د اوبو ښاري مدیریت مرکز د سیمه ييزو چارواکو په ۱۴مه ناسته کې آنلاین ګډون وکړ.
۱۳/لیندۍ /۱۴۰۴ هـ ش
د افغانستان اسلامي امارت د اوبو او انرژي وزارت معین محترم مجیب الرحمن عمر آخندزاده، د یونسکو ترچترلاندې د اوبو ښاري مدیریت مرکز د سیمه ييزو حاکمانو په څوارلسمه ناسته کې، چې په تهران ښار کې جوړه شوې وه، آنلاین ګډون او وینا وکړه.
په دې ناسته کې د ګډونوالو هېوادونو لوړپوړو استازو د اوبو سرچینو مدیریت، ستونزو او سیمهيیزو همکاریو پراخوالي په اړه بحث او نظرونه تبادله کړل.
معین صاحب په خپلو څرګندونو کې د اوبو د سرچینو د مدیریت په برخه کې له شته ستونزو یادونه وکړه او د اوبو پر فعالې او عادلانه دیپلوماسۍ پرارزښت یې ټینګار وکړ، ویې ویل، چې د اوبو فعاله او عادلانه دیپلوماسي کولی شي د اعتماد جوړونې، سیمه يیزو همکاریو پیاوړتیا او د هېوادونو ترمنځ د اختلافاتو کمښت لامل شي.
نوموړي زیاته کړه چې د افغانستان اسلامي امارت اتګلاره پر تفاهم، همکاریو او له سیمې سره پر رغنده تعامل ولاړه ده، او باور لري چې د خبرو، تجربو تبادلې او همکاریو له لارې کولای شو له اوبو څخه عادلانه او دوامداره ګټه واخلو او د دې برخې زیاتېدونکي ګواښونه په مؤثر ډول مدیریت کړو.
یاده دې وي، چې په دې ناسته کې د ایران، عراق، اماراتو، افغانستان، تاجیکستان، پاکستان، بنګله دېش، سریلانکا، ارمنستان او د یونسکو، UNDP او د نړیوالو اوبو سازمان استازو حضوري او آنلاین ګډون کړی و.
