د اوبو او انرژي وزارت سرپرست وزیر د سمنګان ولایت له والي او امنیه قوماندان سره وکتل
د اوبو او انرژي وزارت سرپرست وزیر ښاغلي ملا عبداللطیف " منصور" د خپل کار په دفتر کې د سمنګان ولایت له والي ښاغلي مولوي عبدالرحمن او د یاد ولایت له امنیه قوماندان ښاغلي مولوي عاطف الرحمن" بدر" سره وکتل او په هغه ولایت کې یې د اوبو او انرژي پراختیایي پروژو د پلي کېدو په برخه کې بحث او د نظر تبادله وکړه.
په یاده لیدنه کې، د سمنګان والي او امنیه قوماندان د اوبو او انرژي وزارت له سرپرست وزیر څخه په یاد ولایت کې د اوبو او انرژي پراختیايي پروژو د پلي کېدو غوښتنه وکړه.
په ورته وخت کې، د اوبو او انرژي وزارت سرپرست وزیر ښاغلي ملا عبداللطیف "منصور" د سمنګان ولایت والي او امنیه قوماندان ته ډاډ ورکړ چې د اوبو او انرژي وزارت رهبري د شته امکاناتو او متوازني پراختیا اصل په پام کې نیولو سره به ډېر ژر د دوی غوښتنو ته رسیدګي وکړي.
