د اوبو او انرژي وزارت سرپرست وزیر د څو ولایتونو له مشرانو او ځوانانو سره وکتل
د اوبو او انرژي وزارت سرپرست وزیر ښاغلي ملا عبداللطیف منصور د کابل، لغمان، ننګرهار، پکتیا، پکتیکا، لوګر او میدان وردګ ولایتونو له یو شمېر مشرانو او ځوانانو سره وکتل.
په یاده لیدنه کې، مشرانو او ځوانانو د خپلو خلکو ستونزې او وړاندیزونه د اوبو او انرژي وزارت له سرپرست وزیر سره شریک کړل او د اسلامي نظام د پياوړتیا په برخه کې یې د همکاري او ملاتړ ژمنه وکړه.
د اوبو او انرژي وزارت سرپرست وزیر د یادو ولایتونو مشران او ځوانان یووالي ته وهڅول او ټینګار یې وکړ، چې د متوازنې پراختیا اصل په پام کې نیولو سره به د یادو ولایتونو ستونزو او غوښتنو ته رسیدګي وشي.
همدارنګه ښاغلي منصور په یاده لیدنه کې د اسلامي امارت مسؤلین د افغانستان د خلکو رښتینې خادمین وبلل او څرګنده يې کړه چې یاد مسؤلین د خلکو د هوساینې او د هېواد د آبادي لپاره به شپه او ورځ هڅې وکړي.
