د اوبو او انرژي وزارت نوي ټاکل شوي رئيسان همکارانو ته ور وپېژندل شول
د اوبو او انرژي وزارت درې تنه نوي ټاکل شوي رئيسان چې د ریاست الوزرا د عالي مقام د حکم پر بنسټ نوي ټاکل شوي دي، د وزارت مقام د دفتر د عمومي رئيس ښاغلي قاري محمد عبدالعزیز عزیز له خوا همکارانو ته ور وپېژندل شول.
ښاغلی مولوي عزیزالله سهار د کورنۍ پلټنې د رئيس په توګه، ښاغلی انجنیر عبدالغفور عمري د اوبو تاسیساتو د انجنیري خدمتونو د عمومي رئيس په توګه ، او ښاغلی انجنیر نعمان نثار د اوبو چارو د تنظیم عمومي رئيس په توګه د هغه رئيسانو له ډلې څخه دي، چې د ریاست الوزرا د عالي مقام له خوا په یاد شویو بستونو کې نوي ټاکل شوي دي.
ښاغلي قاري محمد عبدالعزیز عزیز د اوبو او انرژي وزارت د مقام د دفتر عمومي رئيس د یادو رئيسانو د معرفي کولو په وخت کې د دې بدلونونو څخه موخه د چارو د ښه ترسره کول و بلله او ټول کارمندان یې هېواد او د افغانستان خلکو ته د خدمت لپاره د اخلاص او لا زیاتو هڅو ترسره کولو ته وهڅول.
باید یادونه وکړو چې ښاغلی مولوي عزیزالله سهار د دیني علومو فارغ التحصیل او څه باندې لس کاله یې د دیني علومو د مدرس په توګه دنده ترسره کړې ده. هغه د آمریکایانو د اشغال په وخت کې د هېواد د خپلواکي لپاره وسله وال جهاد کړی او همدارنګه د پکتیا ولایت د زرمت ولسوالي د ولسوال په توګه، د یادې ولسوالي د سرګروپ،مالي آمر او د دې ولسوالي د کمیسیون د غړې په توګه دنده ترسره کړې ده.
همدارنګه ښاغلی انجنیر عبدالغفور عمري چې د اوبو تاسیساتو د انجنیري خدمتونو د عمومي رئيس په توګه معرفي شوی، تر دې مخکې یې د اوبو چارو د تنظیم عمومي رئيس په توګه دنده ترسره کوله.
او ښاغلی انجنیر نعمان نثار، چې نوی د اوبو چارو د تنظیم عمومي رئيس په توګه ګومارل شوی دی، د کابل پولي تخنیک پوهنتون د اوبو سرچینو او چاپېریال ساتنې انجنیرۍ پوهنځي څخه د ماسټري سند لري او نږدې لس کاله په پوهنتونونو کې د ښوونکي، د پولې تېریدونکو اوبو او د اوبو د څېړنو په برخه کې کاري تجربه لري.
