د اوبو او انرژي وزیر د میدان وردګ ولایت د چک، سید آباد او سالار کلا ولسوالیو له مشرانو سره د اوبو او انرژي پروژو د پلي کولو په هکله لیدنه او خبرې، اترې وکړې
د اوبو او انرژي وزیر محترم الحاج ملا عبداللطیف منصور د دغه وزارت د غونډو په تالار کې د میدان وردګ ولایت د چک، سید آباد او سالار کلا ولسوالیو د مشرانو او مخورو له یوې ډلې سره وکتل.
په دغه لیدنه کې، د نوموړي ولایت مشرانو په هېواد کې د بنسټیزو پروژو د پراختیا په برخه کې د اوبو او انرژي وزارت د هڅو د ستایلو ترڅنګ، د اوبو بندونو د جوړولو، د اوبیزو سرچینو د مدیریت او برېښنا رسونې په برخه کې د هغه ولایت د خلکو ستونزې او اړتیاوې د وزارت له رهبري سره شریکې کړې.
هغوی ټینګار وکړ، چې میدان وردګ ولایت د پراخو طبیعي وړتیاوو په درلودلو سره، بیا هم د برېښنا انرژي او سطحي اوبو د کنټرولولو په برخو کې له جدي ستونزو سره مخ دی او هر اړخیزې پاملرنې ته اړتیا لري.
د اوبو او انرژي وزیر د میدان وردګ ولایت د مشرانو د خبرو او وړاندیزونو تر اورېدلو وروسته، ډاډ ورکړ چې د وزارت رهبري به د هغه ولایت د خلکو وړاندیزونو او غوښتنو ته پاملرنه وکړي. هغه زیاته کړه، چې د اوبو او انرژي وزارت به د شته امکاناتو او متوازنې پراختیا برنامو په پام کې نیولو سره په میدان وردګ ولایت کې د اوبو بندونو د جوړولو، د برېښنا رسونې شبکو د پراختیا او د اوبو سرچینو د اغېزمن مدیریت پروژو د پلي کولو لپاره عملي اقدامات تر لاس لاندې ونیسي.
