د اوبو د چارو د تنظيم ملي ادارې څخه د هېواد هواي چلند ملکي ادارې ته د متيورولوژيکي(هوا پېژندنې) سټېشنونو لېږدولو هوکړه لیک لاسلیک شو.
د اوبو د چارو د تنظيم ملي ادارې څخه د هېواد هواي چلند ملکي ادارې ته د متيورولوژيکي(هوا پېژندنې) سټېشنونو لېږدولو هوکړه لیک لاسلیک شو.
نن سهار د سرطان مياشتې 23، د اوبو د چارو د تنظيم ملي ادارې عمومي رئيس محترم انجینر خان محمد تکل او د هوايی چلند ملکي ادارې عمومي رئیس محترم ډاکټر محمد قاسم وفایي زاده تر منځ د هوا پېژندنې ملي ادارې د ۲۶ اتومات سټېشنونو د لېږد مسؤلیت هوکړه لیک لاسلیک شو.
د دغه هوکړلیک له مخې د اوبو د چارو د تنظيم ملي ادارې د اوبو د سرچینو عمومي ریاست 26 اتومات متیورولوژيکي سټېشنونه د هوايی چلند ملکي ادارې د هوا پېژندنې ریاست ته وه لېږدول شول.
دغه غونډه چې د هوايی چلند ملکي اداره کې جوړه شوې وه، د هوايی چلند د پلان او پالیسي عمومي رئیس، امانزیب انصاري، د اوبو د چارو د تنظيم ملي ادارې د اوبو سرچینو عمومي رئیس فایزالرحمن عزیزي، د پرواز ستنډرډونو عمومي رئيس، غلام جيلاني وفا، د هوا پېژندنې رئيس، سید رضا موسوي، د هواي چلند ادارې د پرواز ساتنې رئيس، عبیدالله رشیدي او د پروژو د کنټرول او کیفیت رئيس محمد شفیق وکیل ګډون درلود.
دغه هوکړلیک د افغانستان اسلامی جمهوریت جمهور رئیس د هدایت په اساس د اراضي، اوبو، چاپېريال ساتنې(SCOLW) او د سيلاب ملي پالیسي عالي شورا په جلسه کې د اوبو د چارو د تنظيم قانون په پام نیولو سره په هېواد کې د هايدرولوژيک او متیورولوژيکي خدمتونو د تفکیک او تشخیصولو په موخه لاسلیک شو.
بل لورته د اوبو د چارو د تنظيم ملي ادارې د اوبو د سرچینو عمومي ریاست، د هایدرولوژيکي خدماتو په ګډون د اوبو د سرچینو خدمات وړاندې کول او د شمېرو راټولول، په سنديزو حوزو کې د ځمکې د سر او ځمکې د لاندې اوبو د سرچینو د نظارتي شبکې پرمختګ باندې ټينګار او د هایدرولوژي او ميتيورولوژي شمېرو جمع او د خپرولو تفکیک کول او د هوا پېژندنې 26 سټېشنونه انتقال چې د 2012 کال د نړیوال بانک په مالي مرسته لګول شوي سرته ورسېدل.
د ياد هوکړه لیک څخه موخه د هوا پېژندنې د سټېشنونو د لېږدولو پروسه کې د دواړو لورو رول او مسؤليتونه معلومول او په هېواد کې د هایدرومتیورولوژيکي شبکې پرمختګ او د خدماتو وړاندې کولو په برخه کې همکاري کول دي.
د يادونې وړ ده چې دغه 26 اتومات میټورولوژیکي سټیشنونه د تودوخې درجې، د نسبتي رطوبت، د شبنم نقطه، د لمر د وړانګو وخت ، د لمر شدت ، باران، د باد سرعت، د باد لوری، د باد چټک سرعت، د باد چټک سرعت لوری او د هوا فشار سنسرونو لرونکي دي.
سربېره پر دې د اوبو د چارو د تنظيم ملي ادارې او د هوايی چلند ملکي ادارې رهبري د 77 شرکت( د کجکي پروژو پلي کوونکي) سره په همغږۍ د کجکي د اوبو د پروژې د کار ګړندي کولو او هغه ته د لوژيستیکي موادو لیږدولو په موخه خبرې وکړې.
