د سلما بند اوبه د کرنیزو ځمکو د خړوبولو په موخه د ۲۰ ورځو لپاره خوشې شوې
په هغه ناسته کې چې د هرات والي محترم شیخ الحدیث نوراحمد اسلامجار تر رهبري لاندې د هریرود- مرغاب عمومي حوزوي رئيس محترم مولوي سید عبدالسلام مستوفي آغا، د هرات د اوبو او انرژي رئيس محترم مولوي سردار عزیزي، له چشت شریف څخه تر غوریان ولسوالي پورې د هریرود مسیر ولسوالیو د استازو په شتون کې د ولایت مقام د غونډو په تالار کې ترسره شوې وه، پرېکړه وشوه چې د سلما بند اوبه د کرنیزو ځمکو د خړوبولو او هریرود- مرغاب سیند ته د توېيدو په موخه دې د ۲۰ ورځو لپاره خوشې شي.
په دغه ناسته کې، د هرات والي د اوبو سرچینو د ارزښت او ورڅخه د معقولې ګټې اخیستنې، د اوبولګولو نوي سیسټمونو د جوړولو او د اوبو سرچینو د غوره مدیریت په موخه د جذبي څاګانو د کېندلو او میټرونو د نصبولو په هکله خبرې وکړې.
په ورته مهال، د هریرود- مرغاب عمومي حوزوي رئيس د سلما بند اوبو د عادلانه وېش او د سیمه ایزو مسؤلینو او اوبو ټولنو د همکاري په اړه خبرې وکړې.
د دغې ناستې په پای کې له ټولو کروندګرو، قومي مشرانو او اوبو ټولنو له مسؤلینو څخه غوښتنه وشوه، چې د نظم ساتلو، د اوبو د عادلانه او اغېزمن مصرف په برخه کې له اړوندو مسؤلینو سره اړینه همکاري وکړي.
