د اوبو معینیت اونیزه تخنیکي ناسته له پنجشیر سیند څخه کابل ته د اوبو د لېږد پروژې او د یاد معینیت د یو شمېر نورو پروژو په هکله ترسره شوه
یاده ناسته د اوبو او انرژي وزارت د اوبو معین ښاغلي مجیب الرحمن عمر آخندزاده تر مشري لاندې د اوبو سکتور د رئیسانو، د کاپیسا او پروان ولایتونو د فرعي سیندیزو حوزو، سلاکارانو او تخنیکي مسؤلینو په ګډون ترسره شوه.
په یاده ناسته کې د بېلابېلو موضوعاتو په ځانګړې توګه د کابل ښاریانو لپاره د څښاک اوبو برابرولو په موخه له پنجشیر سیند څخه کابل ته د اوبو د لېږد پروژې په هکله بحث او د اندونو تبادله ترسره شوه، چې د دې موضوع په هکله د اوبو ښاغلي معین د پنجشیر ولایت د ګاونډیو فرعي سیندیزو حوزو رئيسانو ته هدایت ورکړ چې د اوبو د کره اندازه ګیري او د یادو ولایتونو د خلکو د حقابې د ټاکلو په هکله تخنیکي مطالعات پیل کړي، ترڅو د یادې پروژې په پلي کولو کې ستونزه رامنځته نه شي.
د ناستې په دوام کې، د غیر الکولي نوشابو او معدني اوبو شرکتونو د موضوع په هکله هم بحث ترسره شو او پرېکړه وشوه چې یوه مشخصه او هر اړخیزه طرحه چمتو شي،ترڅو د اوبو ډېر مصرف کوونکي مشخص شي او له استوګنیزو ځایونو څخه هغو ځایونو ته چې د شرکتونو لپاره ټاکل کېږي، ولېږل شي.
همدارنګه د لوګر ولایت په محمد آغې ولسوالي او د کابل ولایت په موسهي ولسوالي کې د جیوفزیکي څېړنو ترسره کول، د سروبي ۲ برېښنا بند پروپوزل بیا څېړنه او د اوبو ملي کنفرانس د ترسره کولو په پار اړین چمتووالی نیول له نورو موضوعاتو څخه وو، چې په دې ناسته کې ورباندې بحث او د اندونو تبادله ترسره شوه او اړین تصمیمونه ونیول شول.
