د اوبو معینیت اونېزه تخنیکي ناسته ترسره شوه
دغه ناسته د اوبو او انرژي وزارت د اوبو معین محترم مجیب الرحمن عمر آخندزاده تر مشري لاندې د دغه معینیت د رئيسانو، سلاکارانو او یو شمېر تخنیکي مسؤلینو په شتون کې ترسره شوه.
په دغه ناسته کې، د اوبو د تخصیص، د پولې تېريدونکو اوبو او د اوبو رسولو، اوبولګولو او کانالیزسیون ریاستونو مسؤلینو په ۱۴۰۲ لمریز کال کې د خپلو ترسره شوو د کړنو راپور او د ۱۴۰۳ لمریز کال پلانونه د یوه پرزنټیشن په ترڅ کې وړاندې کړل او په هکله یې بحث او د اندونو تبادله وشوه.
همدارنګه په دغه ناسته کې، د اوبو معینیت اړوندو ریاستونو له خوا د سیندیزو حوزو رئيسانو ته د پرزنټيشن په واسطه د اړینو موضوعاتو د شریکولو په هکله هم خبرې، اترې وشوې.
د اوبو محترم معین د پورتنیو موضوعاتو په هکله د رئيسانو او متخصصینو د اندونو تر اورېدلو وروسته، اړوندو مسؤلینو ته د چارو د لا غوره پرمخ وړلو او چټکتیا په موخه اړینې لارښوونې وکړې.
