د اوبو معینیت تخنیکي اونیزه ناسته جوړه شوه.
د اوبو معینیت تخنیکي اونیزه ناسته د اوبو د پروژو د تطبیق په برخه کې له اړوندو ادارو سره د لازمې همغږي، د پروژو د اسنادو د منظم آرشیف او د یاد معینیت د یو شمېر نورو مهمو مسایلو په اړه جوړه شوه.
یاده ناسته د اوبو او انرژي وزارت د اوبو معین ښاغلي انجنیر مجیب الرحمن عمر اخندزاده په مشري د دغه وزارت د اوبو سکتور د رئیسانو او یو شمېر تخنیکي کارکوونکو په حضور کې جوړه شوه.
په دې غونډه کې د پروژو د استملاک آمریت د پیاوړتیا، د اوبو د پروژو د پلي کیدو په خاطر د کرنې او کلیو پراختیا وزارتونو سره د لازمې همغږي، د کمال خان بند د اوسنۍ طرحې د پراختیا او په لویو ښارونو کې د سطحي اوبو د کیفیت د مطالعې په اړه خبرې وشوې.
د اوبو او انرژي وزارت د اوبو معین ښاغلي انجنیر مجیب الرحمن عمر آخندزاده په دغه غونډه کې د یادو موضوعاتو له هر اړخیزې څېړنې او لازمو تصمیمونو وروسته، اړوندو مسوولینو ته لازمې لارښوونې وکړې.
د یادونې وړ ده چې د اوبو وزارت د اوبو معین له رئیسانو سره د غونډې په پای کې دوی د دغه وزارت د اوبو سرچینو د عمومي ریاست له کتابتون، لابراتوارونو او نورو څېړنیزو ماشینونو څخه لیدنه وکړه.
