د ایران د برېښنا د پروژو همغږي کوونکو لېوالتیا ښودلې
د ایران د برېښنا د پروژو همغږي کوونکو لېوالتیا ښودلې چې په افغانستان کې د برېښنا د تولید په برخه کې پانګونه وکړي.
د اوبو او انرژۍ وزارت سرپرست وزیر ښاغلي ملا عبداللطیف منصور د خپل کار په دفتر کې د ایران د اسلامي جمهوریت د بريښنا پروژو له همغږي کوونکي ښاغلي مجید شیزري سره وکتل.
په دې کتنه کې د اوبو او انرژۍ وزارت سرپرست وزیر په افغانستان کې د انرژۍ د تولید او پراختیا په برخه کې د ایران بريښنا تولید مشورتي کانسرسیوم د پانګې اچونې په اړه خوښي څرګنده کړه.
په همدې حال کې د ایران د بریښنا تولید پروژو همغږي کوونکي ښاغلي شیزري د اوبو او انرژۍ وزارت سرپرست سره د ډبرو سکرو څخه د بریښنا تولید طرح شریکه کړه او بلنه یې ورکړه چې د یو رسمي سفر په ترڅ کې د ایران کانسرسیوم مشورتي بریښنا تولید فابریکو څخه لیدنه وکړي.
همداراز دواړو لورو موافقه وکړه چې د وزارت او ایران بریښنا تولید پروژو هغمږي کوونکو تخنیکي مسؤلینو ترمنځه د لازیاتو همکاریو لپاره د همغږۍ جلسې دوام وکړي.
