د برېښنا انرژي په پروژو کې د پانګونې او د هغوی د پاتې چارو د پلي کولو په موخه د همغږي ناسته ترسره شوه
یاده ناسته د اوبو او انرژي وزارت د سرپرست وزیر ښاغلي ملا عبداللطیف منصور تر مشري لاندې د افغانستان برېښنا شرکت اجرائیوي رئيس ښاغلي مولوي محمد حنیف حمزه، د افغان انویست ودانیز شرکت رئيس ښاغلي الحاج شیرباز کمین زاده او یو شمېر نورو مسؤلینو په ګډون ترسره شوه.
په دې ناسته کې، له دشت خواجه الوان څخه تر بغلان او له بغلان څخه تر ارغندي چوک پورې د کابل ولایت د برېښنا
د(Line bay) په پروژو او نورو ملحقاتو کې د پانګونې په موخه د اړیني همغږي په رامنځته کولو په هکله بحث او د اندونو تبادله وشوه.
د ناستې په بهیر کې مسؤلینو د ستونزو د هوارولو او د چارو د پرمخ وړلو په پار خپل اندونه بیان کړل او همدارنګه خپل وړاندیزونه یې د اوبو او انرژي وزارت له رهبري سره شریک کړل.
د اوبو او انرژي وزارت سرپرست وزیر د رئيسانو او مسؤلینو د معلوماتو او اندونو تر څېړلو وروسته اړین هدایات ورکړل او د چارو پر چټکتیا او همغږي باندې یې ټینګار وکړ.
