د برېښنا مارکیټ سوداګریز رئيس او ورسره مل ټیم د برېښنا انرژي په برخه کې د فعالو شرکتونو د پېژندنې او د فعالیتونو د ارزونې په موخه پکتیکا ولایت ته سفر وکړ
د برېښنا مارکیټ سوداګریز رئيس محترم حاجي دولت خان حقیار او ور سره مل تخنیکي ټيم د برېښنا انرژي په برخه کې د فعالو شرکتونو د پېژندنې ، د هغوی د فعالیتونو د ارزونې او د دغو شرکتونو د فعالیتونو د قانوني کېدو په موخه پکتیکا ولایت ته سفر وکړ.
ښاغلي حقیار او ورسره مل ټیم په دغه سفر کې دپکتیکا ولایت د اوبو او انرژي رئيس محترم قاري فتح محمد ذاکر سره وکتل او د پکتیکا ولایت د برېښنا انرژي اوسنی وضعیت او په دې برخه کې شته فرصتونه او ننګونو په هکله بحث وکړ او د هغو شرکتونو لپاره چې د برېښنا انرژي چوپړتیاوې وړاندې کوي، د جواز په ترلاسه کولو باندې ټینګار وکړ.
همدارنګه، نوموړو مسؤلینو په دغه سفر کې د پکتیکا ولایت په مرکز ښرنه او ارګون ولسوالي کې د دوو خصوصي شرکتونو فعالیتونه و څېړل، ترڅو د سټنډردونو څخه ډاډ تر لاسه کړي.
