د ترکیې هېواد یو شمېر پانګوالو د اوبو او انرژي له سرپرست وزیر سره په لیدنه کې د دغه وزارت په پروژو کې د پانګونې لیوالتیا څرګنده کړه
د اوبو او انرژي سرپرست وزیر محترم الحاج ملا عبداللطیف منصور د ترکیې هېواد د آنادولو علماوو له رئیس محترم شیخ عمر فاروق مدرس اوغلو، د تومسیاد سوداګریريزې مؤسسې له رئیس محترم فاتح شینیر او یو شمېر نورو ترکي پانګوالو سره وکتل.
په دغه لیدنه کې د ترکیې هېواد پانګوالو د بېلابېلو سرچینو څخه د برېښنا د تولید په پروژو کې د پانګونې لیوالتیا څرګنده کړه.
د اوبو او انرژي سرپرست وزیر په افغانستان کې د پانګونې په برخه کې ددوی د لیوالتیا ستاینه وکړه او ویې ویل چې دغه هېواد د بېلابېلو سرچینو څخه د انرژي د تولید اړین ظرفیتونه لري او د وزارت رهبري هم په دې برخه کې د پانګوالو له لېوالتیا هر کلی کوي.
ښاغلي منصور ټینګار وکړ، چې د دواړو لورو د مسؤلینو ترمنځ د لا زیاتي همغږي په موخه دې تخنیکي ناستې ترسره شي، ترڅو ډېر ژر د دې پانګونو لپاره زمینه چمتو او عملي چارې پیل شي.
