د دوو بهرنیو شرکتونو مسؤلینو په افغانستان کې د انرژي د تولید په پروژو کې د پانګونې لپاره لېوالتیا څرګنده کړه
د اوبو او انرژي سرپرست وزیر محترم الحاج ملا عبداللطیف منصور له قرغیزستان هېواد څخه د صدف شرکت له مسؤل ښاغلي ابوبکر او له ازبکستان هېواد څخه د ام، جي، سي، سي شرکت له مسؤل ښاغلي مراد سره وکتل او د انرژي په پروژو کې د پانګونې په هکله یې بحث او د اندونو تبادله وکړه.
په دغه لیدنه کې، د نوموړو شرکتونو مسؤلینو وویل چې لېواله دي، چې په افغانستان کې د انرژي په پروژو کې له نوي ټکنالوژي څخه په ګټې اخیستنې سره، چې دغه ټکنالوژي د سولر یا نورو سرچینو لکه باد، د ډبرو سکرو یا اوبو باندې تړلې نه وي، پانګونه وکړي.
د اوبو او انرژي سرپرست وزیر د هغوی د لېوالتیا هر کلی وکړ او د پانګونې لپاره یې د زمینې چمتو کولو په موخه هغوی ته ډاډ ورکړ او د اړینو همغږیو د رامنځته کولو او د عملي چارو د پیل پر چټکتیا باندې یې ټینګار وکړ.
