د سرپل ولایت درېيو ولسوالیو ته د برېښنا رسولو پروژې چارې د نږدې ۹ سوه میلیونه افغانیو په لګښت پیل شوې
۱۲/ ذوالقعده/ ۱۴۴۷هـ ق
۹/ ثور/ ۱۴۰۵ هـ ل
د سرپل ولایت د ګوسفندي، سوزمه قلعه او سنګچارک ولسوالیو ته د برېښنا رسولو پروژې چارې د ۸۸۰ میلیونه افغانیو په لګښت د اوبو او انرژي وزیر محترم الحاج ملا محمد یونس آخندزاده، د اوبو معین محترم مجیب الرحمن عمر آخندزاده، د سرپل والي محترم مولوي احمدشاه دیندوست، امنیه قوماندان محترم ملا نیک محمد ملنګ، علماوو، قومي مشرانو او د سیمې د خلکو په شتون کې پیل شوې.
د نوموړې پروژې چارې به د درېیو کلونو په موده کې بشپړې شي، چې ګټې ته په سپارلو سره به یې په ګوسفندي ولسوالي کې ۷۵۰۰ کورنۍ، په سوزمه قلعه ولسوالي کې ۶۶۰۰ کورنۍ او په سنګچارک ولسوالي کې ۱۳۵۰۰ کورنۍ د برېښنا له نعمت څخه برخمنې شي.
د دغې پروژې چارې د افغانستان اسلامي امارت په لګښت د یوه خصوصي شرکت له لوري پرمخ وړل کېږي، چې پکې په مستقیم او غیرمستقیم ډول ۵۰۰ کسانو ته د کار زمینه چمتو شوې ده.
