د عزیزي ګروپ د شرکت له استازو سره د پانګونې لپاره د انرژي پروژو د پېژندلو په موخه تخنیکي ناسته ترسره شوه
دغه ناسته د اوبو او انرژي وزارت د پانګونې د جلب او جذب رئیس مولوي رحمت ولي رحماني په مشرۍ د اوبو او انرژي وزارت د انرژی سکتور تخنیکي مسؤلینو او د عزیزي ګروپ شرکت د استازو په شتون کې ترسره شوه.
په دغه ناسته کې د اوبو او انرژي وزارت او د عزیزي ګروپ شرکت تر منځ د همکاري د هوکړې تنظیم، د انرژي پروژو د پېژندلو او لومړیتوبونو او همدارنګه د انرژي په برخه کې د دغه شرکت د پانګونې د چارو پرمخ وړلو د څرنګوالي په هکله بحث او د اندونو تبادله وشوه.
د دغې ناستې په بهیر کې دواړو خواوو د اړینو بحثونو او د اندونو تبادلې څخه وروسته، د همکاري هوکړه لیک متن په بشپړ توافق سره نهايي شو تر څو په نږدې راتلونکي کې د اوبو او انرژي وزارت د لوړ پوړو مقاماتو او د عزیزي ګروپ شرکت د رهبري پلاوي ترمنځ لاسلیک شي.
همدارنګه د دغې ناستې په بهیر کې دواړو خواوو د پروژو د انتخابولو او پلي کولو په تړاو د خپلو برنامو په هکله اړین توضېحات وړاندې کړل او د انرژي پروژو پلي کولو د چټکتیا لپاره یې پر ګډې همکاري ټینګار وکړ.
د یادونې وړ ده چې درې ورځې وړاندې، د عزیزي ګروپ شرکت استازو د همغږۍ په یوه ناسته کې د اوبو او انرژي وزارت له یو شمېر رئیسانو سره په افغانستان کې له بېلابېلو سرچینو څخه د ۱۰ زره مېګاواټه برېښنا په تولید کې د پانګونې لپاره خپلې اوږدمهاله برنامې تشرېح کړې، چې د اوبو او انرژي وزارت هم ددغه ګام په ستایلو سره، د دغو پروژو د تحقق په موخه د هر ډول اړینو همکاريو او اسانتیاوو لپاره خپل بشپړ تیاری اعلان کړ.
