د فراه ولایت د بخش آباد بند د رغنیزو چارو پر چټکتیا باندې ټینګار وشو
د هرات والي محترم شیخ الحدیث مولانا نوراحمد اسلام جار، د اطلاعاتو او کلتور وزارت د خپرونو چارو معین او د هرات مرستیال والي محترم مولوي حیات الله مهاجر فراهي، د هریرود- مرغاب سیندیزې حوزې عمومي رئيس محترم مولوي عبدالسلام مستوفي آغا، د فراه رود سیندیزې فرعي حوزې رئيس محترم ملا برهان الدین مینوال او یو شمېر نورو مسؤلینو د بخش آباد بند د رغنیزو چارو له بهیر څخه لېدنه وکړه.
د هرات والي او مرستیال یې د بخش آباد بند د رغنیزو چارو له بهیر څخه د لېدنې پرمهال دغه بند د هېواد په کچه یوه اړینه پروژه وبلله او د چارو پر چټکتیا باندې یې ټینګار وکړ.
په ورته مهال، د بخش آباد بند د پروژې مسؤل محترم انجنیر سید محمد امین صالحي د دغه بند د رغنیزو چارو د رغنیزو توکو او چټکتیا په هکله ډاډ ورکړ او زیاته یې کړه، چې په دغه بند کې ټول کاروونکي توکي د اوبو او انرژي وزارت د مقام، د نورم او سټنډرډ او د ټاکلي پلان له مخي له بشپړې آزموینې وروسته کاریږي.
