د فراه ولایت د بخش اباد بند د انحرافي تونلونو رغنيزې چارې 52 سلنه پرمخ تللې دي
د فراه ولایت والي مولوي غوث الدين رهبر په داسې حال کې د بخش اباد بند د انحرافي تونلونو د رغنيزو چارو له بهیر څخه لیدنه وکړه چې د استخباراتو رئيس، امنيه قوماندان مولوي محمد عيسی شريف، د فراهرود سیندیزې فرعي حوزې رئيس ملا برهان الدین مينوال، د فراه رود ولسوالي ولسوال ملا محمد صادق جهادمل، د نوموړې پروژې مسؤلينو او تخنیکي ټيم هم شتون درلود.
ښاغلي رهبر د فراه ولسي وګړو ته د بخش اباد بند د رغنيزو چارو د لا چټکتيا، په ښه توګه د ترسراوي او د غوره پرمخ وړلو په موخه ډاډ ورکړ او زياته یې کړه، چې د نوموړي بند د انحرافي تونلونو چارې 52 سلنه پرمخ تللي دي او د مسؤولینو لخوا به یې چارې لا زیاتې په چټکۍ سره ترسره شي.
د فراهرود سیندیزې فرعي حوزې رئيس ملا برهان الدین مينوال څرګنده کړه چې د دغه بند د انحرافي تونلونو روانې رغنيزې چارې د پخوا په پرتله ګړندۍ شوي او اړوندو مسؤولينو ته اړینې لارښوونې او سپارښتنې هم ورکول کېږي.
له بلې خوا د بخش اباد بند د انحرافي تونلونو د پروژې د کنټرول او کيفيت مدير انجينر محمد رفیق نوري وویل چې د بخش آباد بند د انحرافي تونلونو روانې چارې شاوخوا 52 سلنه پرمخ تللي دي چې فزيکي چارې یې 70 سلنه، پرته له سيخ څخه کانکريټ 100 سلنه، ګاډرونه 100 سلنه، وايرميش 70 سلنه، شارکريټ 30 سلنه، سيخ لرونکی لاندينی کانګريټ 100 سلنه بشپړې شوي او همدارنګه د ديوالونو د سيخونو چارې هم دوام لري.
