د هلمند ولایت د خلکو د استازی او مشرانو سره لیدنه
د اوبو د چارو د تنظیم د ملي ادارې عمومي ریس او د انرژۍ د خدمتونو د تنظیم د ادارې سرپرست ښاغلي انجنیر خان محمد تکل په ولسي جرګه کې د هلمند ولایت له استازي حاجي غلام ولي افغان او د یاد ولایت له یو شمیر مخورو او مشرانو سره وکتل.
په دې لیدنه کې په یاد ولایت کې د اوبو د چارو د تنظیم د ملي ادارې د انکشافي پروژو په ځانګړې توګه د بګت کانال، د کاریز کانال، د نوی بغرا سربند او د نورو چکدمونو او د سیند په څنډو کې د تحکیماتو د جوړولو په اړه خبرې وکړې.
په ورته وخت کې د اوبو د چارو د تنظیم د ملي ادارې عمومي ریس د اوبو د ښه مدیریت په اړه د هلمند ولایت مشرانو ته ډاډ ورکړ، زیاته یې کړه چې هلمند ولایت ته يې یو تخنيکي ټيم په سروې بوخت دی، چې تر راستنیدو او ډيزاین وروسته به یې په یاد ولایت کې د ګڼو نورو پروژو کار عملاً پیل شي.
