د کندهار ولایت په ارغستان کې د لورې بند د مطالعاتو د ترسره کولو، ډیزاین او د شاتوت- للندر بند د ستونزو د هوارولو په موخه د همغږي ناسته ترسره شوه
په یاده ناسته کې د اوبو او انرژي وزارت د اوبو معین ښاغلي مجیب الرحمن عمر آخندزاده د یاد معینیت له رئيسانو او مسؤلینو سره د شاتوت- للندر بند د ستونزو د هوارولو او د کندهار ولایت په ارغستان کې د لورې بند د پروژې د ډیزاین د چمتوکولو په هکله بحث او د نظر تبادله وکړه.
د ناستې په بهیر کې، د یادو پروژو د وضعیت د څېړنې او د هغوی د ستونزو د هوارولو په لارو چارو باندې خبرې وشوې، چې د رئيسانو او مسؤلینو د اندونو تر اورېدلو وروسته د اوبو ښاغلي معین هغوی ته اړین تخنیکي هدایات ورکړل.
همدارنګه د اوبو معین ټینګار وکړ،چې د ارغستان د لورې بند د پروژې د ډيزاین په موخه له همکارو شرکتونو سره اړینې همغږي ترسره شي، ترڅو ژر تر ژره د یادې پروژې د ډیزاین چارې پیل شي.
